Patigayunon na 8:00 subong nga aga oras sa Pilipinas ang 97th Oscars ukon ang Academy Awards nga amo ang pinakamataas nga pagkilala sa industriya sang pelikula.
Balantayan ang pila sa pinakadaku nga pangalan sa Hollywood sa star-studded kag red-carpet ceremony sa Dolby Theatre sa Ovation Hollywood sa Los Angeles, California, United States.
Ang Emmy Award-winning television host, writer, producer, kag comedian nga si Conan O’Brien amo ang mangin host sa programa.
Sa lista sang nominees, nagapanguna ang Spanish-language French musical crime comedy film nga Emilia Pérez nga may 13 nominations; ang epic period drama film nga The Brutalist nga may 10; kag ang musical fantasy film nga Wicked nga may 10 man ka mga nominasyon lakip na ang 1st Oscar nod para kay Ariana Grande sa Best Supporting Actress.
Naga-agaway para sa Best Picture award amo ang masunod: Anora, The Brutalist, A Complete Unknown, Conclave, Dune: Part Two, Emilia Pérez, I’m Still Here, Nickel Boys, The Substance, kag Wicked.
Yara man sa line-up sang presenters sanday Gal Gadot, Andrew Garfield, Selena Gomez, Oprah Winfrey, Joe Alwyn, kag madamo nga iban pa nga celebrities.
Magaabot man sa seremonya ang nakakuha sa pinakamataas nga acting awards sang nagligad nga tuig nga amo sanday Emma Stone, Robert Downey Jr., Cillian Murphy, kag Da’Vine Joy Randolph.
Ang magadaog sa Oscars ang ginapili sang ginabanta 11,000 actors, producers, directors kag film craftspeople sa idalom sang Academy of Motion Picture Arts and Sciences.
Subong nga tuig, wala sang bisan isa sa 10 ka best picture contenders ang gin-shoot sa Los Angeles apisar nga ini ang ginakabig nga puluy-an sang pinakadalagku nga film companies sa masobra na isa ka siglo.
Ini nga seremonya ang isa man sa una nga pinakadaku nga hiwaton sa Los Angeles matapos ang natabo nga lapnagon nga wildfires sang Enero nga nangin rason man kun ngaa duha ka beses nga nakanselar ang Academy Awards.
Ginalauman nga mahambalan man ang wildfires sa sini nga event, direkta man ukon paagi sa tema, kag makahatag man sang donasyon ang viewers sa programa.
