Ginmanduan ni Iloilo City Mayor Jerry Treñas ang Department of Public Works and Highways (DPWH) Region 6 nga patambungon gid sa pagsinapol si Iloilo City District Engineering Office Head Engineer Roy Pacanan.
Ini kaangot man sa mga wala natapos nga proyekto sang nasambit nga talatapan.
Sa interview sang Bombo Radyo kay Mayor Treñas, iya ginpahayag nga nakig-istorya na siya kaupod si DPWH Regional Director Engr. Sanny Boy Oropel kon sa diin, nag-issue na ini sa memorandum nga kinahanglan magtambong si Pacanan.
Suno kay Treñas, tinutuyo sang meeting amo ang mahibaluan kon may pondo pa agud nga mapadayon ang mga wala natapos nga proyekto.
Gin-athag man sini nga kon wala na gid man sang pondo, mahimo nga makig-angot ang syudad sa mga engineers, architect, kag city council.
Patigayunon ang meeting sa Byernes, Marso 7, 2025.
Handa naman ang alkalde nga magpamati sang bahin ni Pacanan apisar pa nga naka-persona non grata ini sa syudad.
Nahibaluan nga may mga multipurpose building sa pila ka mga kabarangayan sa syudad nga tubtob subong, wala natapos ka human.
