Nagapabilin nga wala pa sang tul-id nga ihibalo ang Department of Public Works and Highways Region 6 (DPWH-6) kon san-o ma-release ang P275 million nga pondo para sa jet grouting sang Aganan Flyover.
Sa interview sang Bombo Radyo kay Engineer Sanny Boy Oropel, Regional Director sang Department of Public Works and Highways Region 6, iya ginpahayag nga ang jet grouting ang agud ma-rectify ang disenyo sang amo nga proyekto.
Suno kay Oropel, isa sa mga nagapanguna nga isyu nga ginaatubang sang flyover amo diperensya sa datos sang pagtesting sang duta.
Nagaguwa nga sa una nga assessment sang United Technology Consolidated Partnership (UTCP) nga ang kadalumon sang haligi ang yara lamang sa 24 metros, samtang ang DPWH-6 nagapakita sang kinahanglanon nga kadalumon nga 54 metros agud malab-ot ang estable nga duta.
Ini nga issue ang nagdul-ong man sang kompromiso sa kalig-on sang istruktura, nga temporary nagpauntat sang proyekto sang Disyembre 2022 kag nagkinahanglan sang dugang nga repair.
Nahibaluan nga ang amo nga proseso ang ginhimoman sa Ungka Flyover, kon sa diin nagalakip sang pag-inject sang cement-like material sa idalom sang pundasyon sang estraktura agud mapapag-on ang duta kag malikawan ang bisan ano nga paghulag.
Samtang ginalantaw nga magalawig sang tatlo ka bulan ang pagtapos sang jet grouting.
