Kun si Toyang nagaistar sa kweba bangud isa ini ka ermitanya, ikaw, ano ayhan ang magtulod sa imo agud mag-istar man sa kweba?
Pero samtang nagapanumdom ka, istoryahan ko na lang ikaw natuhoy sa isa ka lalaki nga 2 ka tuig na nga nagapuyo sa sulod sang kweba.
Ini amo ang isa ka lalaki sa Turkey, ang pungsod nga gintay-og sang 7.8 magnitude nga linog sang 2023 kun sa diin madamo ang nagkalamatay.
Suno kay Ali Bozoğlan, amay sang tatlo ka kabataan halin sa southern province sang Hatay, nadula ang iya balay bangud sang linog.
Apisar nakaluwas sila sang iya pamilya, tuman nga nahadlok na ini sa linog gani nagdesisyon siya nga indi na mag-istar sa isa ka building nga ginhimo sang tawo.
Sa baylo, nakapangita siya sang isa ka gamay nga kweba malapit man sa ila ginaistaran kag ini ang ginhimo niya nga puluy-an.
Apisar wala niya nakumbinse ang iya pamilya nga mag-upod sa iya sa kweba, nalipay gihapon si Ali sa iya bag-o nga puluy-an bangud malinong diri kag matawhay.
Apisar madamo ang mga naghaboy sang malain nga mga komento batok sa iya, wala na lang ini ginasapak ni Ali bangud ini ang ginakabig niya nga pinakamatahum nga puluy-an.
