Ginbasura sang Korte Suprema sang Estados Unidos sang Amerika ang request sang Trump administration nga ipabilin nga frozen ukon indi pag-i-release ang $2 billion ukon P114.75-billion nga foreign aid nga aprubado na sang Kongreso.
5-4 ang desisyon sang Supreme Court nga amo ang ginakabig una nga significant ruling sa legal challenge nga ginpasaka batok sa desisyon ni US President Donald Trump.
Sa boto nga ini, ginapapag-on ang desisyon sang lower court nga i-require ang pagbayad sa aid contracts nga nakumpleto na.
Apang sa amo man nga ruling, wala sang particular nga petsa nga ginhatag kun san-o dapat i-release ang kuwarta, rason nga may ligwa para sa White House nga iinsister ang isyu sa lower courts.
Suno sa justices, ang federal judge nga nagmandu sa pagbalik sang payments para sa kontrata sa US Agency for International Development (USAID) kag State Department ang dapat nga mag-klaro sang obligasyon nga dapat tungdan sang gobyerno.
Sa nine-member Supreme Court, ang nagboto amo ang tatlo ka liberal justices, ang chief justice nga si John Roberts, kag si Amy Coney Barrett nga isa ka Trump appointee.
Matandaan nga may district judge nga appointee ni former President Joe Biden nga nag-isyu sang temporary restraining order sang nagligad nga bulan nga amo ang nagadumili sa Trump administration sa pagsuspinde sang foreign assistance funds.
Ang pinakaapektado sang nauna nga mandu ni Trump amo ang USAID nga amo ang nagapanguna nga organisasyon sa pagpanghatag sang US humanitarian aid sa kalibutan paagi sa ila health and emergency programs sa 120 gid ka mga pungsod.
Antes pa man ini nga desisyon sang Korte Suprema, nauna na nga ginkumpirma nga exempted sa global aid freeze ang ayuda nga ginahatag sang Estados Unidos sa Pilipinas particular na ang US foreign military financing.
