Nakit-an na nga wala sang kabuhi ang 5 ka tuig nga bata matapos nga nagkapan ang pumboat nga ginasakyan sini kaupod ang iya amay sa Sitio Tumanda, Barangay Cabano, San Lorenzo, Guimaras.
Ang 5 ka tuig nga bata amo si John Jezther Gamilong, samtang ang amay sini amo si Johnel Gamilong, residente sang nasambit nga lugar.
Sa interview sang Bombo Radyo kay Police Captain Joje Gania, Officer in Charge sang San Lorenzo, Guimaras Municipal Police Station, iya ginpahayag nga apat sila nga nagpadulong sa lawod kon sa diin, makuha lang kontani sang lambat nga ila man nga ginbutang.
Apang sa amo nga tion, gulpi lang nga nagbaskog ang balod rason nga nagkaya gid ang ila ginasakyan nga pumboat.
Nakalangoy pa pabalik sa shoreline ang iban nga kaupdanan sang mag-amay.
Gintuad man sang mga kaupdanan sang biktima nga ginlangoy pa sang amay ang iya anak agud nga mapahigad apang bangod sa mabalod ang lawod, nagsarurot man ang duha.
Suno kay Gania, nasapwan ang lamharon sa bulig sang rescue team, sang San Lorenzo Municipal Police Station, Philippine Coast Guard, Bantay Dagat, kag Municipal Disaster Risk Reduction Management Office.
Nakit-an nga nagautaw-utaw ang bata sa baybayon nga sakop sang Brgy. Sebario, San Lorenzo, Guimaras.
Padayon naman ang search and rescue operation sang otoridad sa amay sang biktima nga tubtob subong, nagapabilin nga missing.
