Naghiwat sang Regional Fire Olympics 2025 ang Bureau of Fire Protection Region 6 (BFP-6) subong nga adlaw sa Iloilo Freedom Grandstand.
Sa interview sang Bombo Radyo kay Fire Senior Inspector Jasmin Mecenas, Acting Chief sa Fire Safety Enforcement Division, iya ginpahayag nga delayed ang kick off bangud ang ila regional director ang nagtambong man sang amo nga kahiwatan sa Region IV-A sang nagligad nga adlaw.
Suno kay Mecenas, ang aktibidad ang kabahin man sang ginasaulog nga Fire Prevention Month subong nga Marso.
Lakip sa mga nagpartisipar amo ang probinsya sang Guimaras, Antique, Capiz, Negros Occidental, kag Iloilo.
Nagpasakop man ang anom ka mga barangay fire brigade sa kahiwatan.
Gin-athag man sini nga tinutuyo sang programa nga mapasangkad ang abilidad kag ikasarang sang mga bombero sa pagtapna sang sunog.
Igarepresentar naman sang mga magadaog ang Western Visayas sa hiwaton nga kaangay nga programa sa national nga bahin.
Nagpahanumdom man ang Bureau of Fire Protection Region 6 sa publiko nga magpabilin nga ‘conscious’ sa mga kagamitan sa panimalay kaangay na lang sang mga appliances.
Suno kay Fire Chief Superintendent Felixberto Abrenica, Regional Director sang BFP Region 6, iya ginpahayag nga tuman ka importante ang self awareness sa mga bagay nga posible matunaan sang kalayo.
Ginpunto man sini nga mahimo mangin factor ang tuman ka init sang panahon rason man nga mas doblehon ang pagbantay sa mga naka-plug in nga kagamitan.
