Gin-anunsyo ni Palace Press Officer, Undersecretary Atty. Claire Castro nga ginpahanugutan sang Department of Agriculture and Food Terminal Incorporated (FTI) ang mga local government units (LGUs) nga makautang sang bugas sa National Food Authority (NFA).
Suno kay Castro, ginahatagan sang 1 ka bulan ukon 30 ka adlaw ang mga LGUs agud mag-procure sang bugas kag dayon bayaran kon mabaligya na.
Daku ang bulig sang nasambit nga tikang ilabi na sa mga LGUs nga wala sang pundo ukon kwarta para ibakal sang NFA rice.
Nagapati si Agriculture Secretary Francisco Tiu Laurel nga ang nasambit nga tikang ang isa ka paagi agud madasig nga mapaguwa ang NFA rice.
Apang suno kay Castro, wala pa ginmensyonar sang DA kon pila ang mahimo nga mautang sang isa ka LGU nga bugas kag kon ano ang mangin sistema kon mag-utang.
Una nga ginpahayag ni NFA administrator Larry Lacson nga 70 ka mga LGUs ang nagpabutyag sang interes sa pagkuha sang bugas sang NFA, nangin mahinay man ang pag-release sang supply bangud sa mahinay nga proseso san mga LGUs, samtang ang iban kulang sa pundo.
