Nagpaguwa sang audio message si Pope Francis sa labing-una nga tion halin sang na-ospital siya sa Roma bangud sa ginasuprer nga double pneumonia.
Ginpabati ang message broadcast sa St. Peter’s Square kadungan sang Holy Rosary nga ginhimo sang Vatican para man ipangamuyo ang pag-recover sang 88-anyos nga Santo Papa.
Sa mensahe sini, ginpasalamatan sini ang tanan nga nagpangamuyo para sa iya. Nagsiling man ini nga ginapangabay niya nga proteksyunan man sang Diyos ang mga tumuluo.
Mahinay ang tingog sang Pope kag daw kaangay nga nabudlayan ini sa pagginhawa samtang nga ginagamit ang iya native language nga Spanish.
“I thank you from the bottom of my heart for your prayers for my health from the Square, I accompany you from here,” suno sa Argentine Pope. “May God bless you and the Virgin protect you. Thank you.”
Ini ang una nga direkta nga mensahe sang Pope halin sang na-admit siya sa Gemelli Hospital sa Roma sang Pebrero 14.
Antes sini nga message sang Santo Papa, ginsiling sang Vatican nga magahatag sila sang masunod nga update sa ikaayong lawas sang Santo Papa sa Sabado oras sa Roma.
Huwebes sang gab-i sang gin-anunsyo ini sang Holy See Press Office kadungan sang ila kumpirmasyon nga stable gihapon ang kondisyon sang Pope, wala sang hilanat, kag wala sang bag-o nga episode.
Bangud ginkonsiderar nga stable ang clinical picture, ginsiling sang mga doctor nga ipaiway anay ang pag-isyu sang medical bulletin sa Byernes kag bantayan sa Sabado nga masami gab-i ginapaguwa sa Roma kag Domingo sang kaagahon naman diri sa Pilipinas.
Ginsiling man sang Vatican nga kaangay sa nagligad nga mga inadlaw, nasarangan sang pope nga masal-ot ang iya trabaho sa ospital samtang nga nagapadayon sa pagpaaayo kag samtang nga nagapahuway.
