Personal nga nagpadulong sa Barangay Infante, Molo, Iloilo City ang pila ka mga estudyante sang mag-asawa nga manunudlo nga napatay bangud sa sunog.
Ang mga biktima amo ang mag-asawa nga sanday Julius Reyes kag Louelyn Reyes nga pareho nga manunudlo sa Iloilo City, kag ang ila anak nga si Amber Marie, pito ka tuig.
Sa interview sang Bombo Radyo kay Angel Mae Sariego, estudyante sang mag-asawa, iya ginpahayag nga indi lamang sila manunudlo kundi nagserbe man nga iloy kag amay sa ila.
Suno kay Sariego, nangin manunudlo niya si Louelyn Reyes sugod Grade 8 kag tuman gid ang iya kakibot sang nabatian ang balita nga lakip si Reyes sa mga nasunog.
Ginpahayag man sini nga nangin coach nila ang mag-asawa sang mga kompetisyon may kaangtanan sa visual arts.
Wala man napunggan sang natungdan nga magtulo ang iya luha sa pagtaliwan sang ginakabig sini, ika-duha nga ginikanan.
Nahibaluan nga ang mag-asawa ang lunsay nagatudlo sa Iloilo City National High School.
