Atubangon sang two-time Olympian nga si EJ Obiena ang makabig “best of the best” pole vaulters sa 2025 Mondo Classic sa Uppsala, Sweden subong nga semana.
Apisar indi na makasulod sa World Indoor Championship, magapasakop si Obiena sa sini nga tournament nga amo ang iya katapusan nga indoor event antes magliso ang atensyon sa outdoor season.
Lakip sa makasumpong sang Pinoy Olympians sa Sweden amo ang world no. 1 kag two-time Olympic champion nga si Mondo Duplantis nga nakaguba sang iya kaugalingon nga world record sang nalukso sini ang 6.27m sa World Athletics Indoor Tour silver meeting sa France sang nagligad nga bulan.
Yara man sa kumpetisyon ang mga nakasumpong ni Obiena sa 2024 Olympics nga sanday Paris Olympics silver medalist Sam Kendricks sang United States kag bronze winner Emmanouil Karalis sang Greece.
Tanan nga participants ang may average nga 5.80m sa ila personal ukon seasonal bests, amo man sa performances sa nagligad nga Olympics.
Pagkatapos sini, magatutok na si Obiena sa preparasyon sa outdoors para sa iya pag-compete sa tatlo ka dalagku nga events kaangay sang Asian Championships sa Gumi, South Korea sa May 21 to 31; World Outdoor Championships sa Tokyo, Japan sa Sept. 13 to 21; kag ang Southeast Asian Games sa Bangkok, Thailand sa Dec. 7 to 19.
Nagapang-apat subong ang Pinoy pride sa world rankings kasunod sang injury nga iya naangkon nga rason kun ngaa temprano nga natapos ang iya 2024 season.
