Nagpaandam ang Bureau of Animal Industry (BAI) batok sa paglapta sang mga indi rehistrado nga pet food products nga ginabaligya online lakip na sa bantog nga e-commerce platforms kag sa TikTok.
Sa advisory sang ahensya, ginsiling nga nakumpirma sa ila nga post-marketing surveillance kag verification sang records nga may nagkalain-lain nga mga produkto online nga kulang sa husto nga certification.
Ginpahayag man nga indi ma-identify kun sin-o ang suppliers.
Gina-abisuhan ang mga tag-iya sini nga produkto nga magpakig-angot sa BAI kag sa Food and Drug Administration, ilabi na sa items nga may therapeutic claims agud nga masiguro ang proper evaluation kag registration.
Pahayag pa sang bureau, indi man dapat pagbaklon kag i-promote sang pet owners ang unregistered feed products tubtub nga ma-certify na ini sang BAI kag FDA.
Lakip sa unregistered products kag brands nga nadiskubrehan sang BAI amo ang veTcore+, Fit Paws, Tovitar, Popoo kag Petcher Organics.
Lakip sa items ang pagkaon sang ido, produkto para sa pagpanami pa sa fur, hip and joint health, kag gut health sang hinuptanan, kag naga-claim man nga maka-boost sang immunity.
Nahibaluan nga isa sa pinakadasig sa market sa Pilipinas subong ang pet food rason nga nagsulod naman ang domestic animal feed makers sa pet food products para maislan ang nadula nga demand halin sa traditional markets.
Ginabanta sang industry players nga ang pet food market sa pungsod ang nagadangat sa P24 billion kag mas nagadaku sa kada tuig.
