Ginalantaw sang Iloilo City Bureau of Fire Protection (BFP) nga posible electrical in nature ang rason sang sunog nga nagluntad sa Brgy. Infante, Molo, Iloilo City.
Ang mga biktima amo ang mag-asawa nga sanday Julius Reyes kag Louelyn Reyes nga pareho nga manunudlo sa Iloilo City, kag ang ila anak nga si Amber Marie, pito ka tuig.
Sa interview sang Bombo Radyo kay Senior Fire Officer 1 Denmark Macoco, Chief sang Intelligence and Investigation Unit sang Iloilo City Fire Station, iya ginpahayag nga nagsugod gid ang kalayo sa hallway sang ika-duha nga panalgan sang balay sang pamilya Reyes.
Suno kay Macoco, indi pa man matul-id kon ano gid ang kabangdanan sang sunog bangud tubtob subong, ginapaidalom sa laboratory analysis ang mga na-recover nga electrical wires.
Gin-athag man sini nga ang mga electric wire ang may senyales sang short circuit apang agud makasigurado sang conclusion, ginpasigurado sang talatapan nga ipadala sa national nga opisina sang BFP agud mapaidalom sa tests.
Ginasekyar man sang BFP ang pila ka mga closed circuit television (CCTV) sa mga kaingod balay agud mahibaluan kon intentional ang nagluntad nga sunog.
