Ginkalipay apang may kabalaka ang nabatyagan si Former Congressman Gary Alejano matapos nga na-issue ang International Criminal Court (ICC) sang warrant of arrest batok kay Former President Rodrigo Duterte.
Sa interview sang Bombo Radyo kay Alejano, iya ginpahayag nga una na siya nga nagpasaka sang kaso, apang gilayon man nga ginbasura bangud sa amo nga tion, wala sang plano ang administrasyon nga pasabton ang anay presidente.
Gin-athag man sini nga indi dapat magkabalaka ang supporters ni Duterte bangud maga-agi sang insakto nga due process ang kaso.
Ginpunto man sang natungdan nga indi matabo kay Duterte ang natabo sa mga biktima sang extra judicial killings sa tion sang iya administrasyon bangud wala sang ‘due process’ ang mga ginpamatay bangud sa war on drugs.
Suno kay Alejano, sakop sa gihapon sang ICC ang kaso ni Duterte bangud na-file ini antes pa man nga nagkalas ang Pilipinas sa ICC sang 2019.
Para sa iya, dapat mangin malipay ang Pilipino bangud isa ini ka palaagyan agud nga mas mapabaskog ang sistema sang demokrasya sang Pilipinas.
Nagpanindugan man ini nga wala sang pamulitika sa nangin proseso kag lunsay legal ang natabo.
