Ginkumpirma sang Committee on Public Private Partnership (PPP) sang Iloilo City Government nga wala natigayon ang ila negosasyon sa tunga sang First Balfour kaangot sa Electric High-Capacity Bus System.
Sa interview sang Bombo Radyo kay Atty. David Garcia, Vice Chairman sang Committee on Public Private Partnership (PPP), iya ginpahayag nga napaslawan ang talatapan sa negosasyon sa taripa sang plete kon sa diin, naghilisugot na kontani ang syudad sa presyohanay.
Suno kay Garcia, isa sa factor amo bangud wala sang assurance ang Land Transportation Franchising and Regulatory Board (LTFRB) kon maaprubahan ang 12% nga increase every 3 years sa plete.
Nagpaathag na man ang LTFRB nga ang pagpataas sa plete amo ang ‘per centavo’ kag indi ‘per peso’.
Samtang kon padayunon naman ang amo nga tikang, lima ka porsyento sa 12% ang tabunan sang syudad agud matigayon ang Electric High Capacity Bus System.
Ini kasunod man nga 7% lang ang gin-aprubahan sang LTFRB.
Nagprangka naman ang First Balfour nga mabudlayan nga mapatuman ang kon ang luyag sang syudad ang pagasundon.
Ginpahayag man ni Garcia nga apisar sang amo nga sitwasyon, may posibilidad sa gihapon nga magbalik-negosasyon ang First Balfour agud nga magtanyag sang bag-o nga offer.
Kon balikan, sang nagligad nga tuig, nagpirma si Vice Mayor Jeffrey Ganzon sang memorandum of agreement kaupod ang Swedfund – ang development finance institution sang Swedish government para sa 6-million Swedish krona ukon P33 million on behalf sang Metro Iloilo-Guimaras Economic Development Council.
Sakop sang nasambit nga grant ang pagpondo sang comprehensive feasibility study, technical assessments, financial projections, kag environmental and social impact analysis.
