Nagpaguwa sang statement si International Criminal Court (ICC) Chief Prosecutor Karim Khan kasunod sang pagkaaresto kay former President Rodrigo Roa Duterte kag pagtugyan sa iya sa kustodiya sang international tribunal sa The Hague.
Suno kay Khan, ang pagdakop kay Duterte ang makabig nga importante nga tion para sa mga ginaalegar nga nabiktima sang war on drugs sa Pilipinas. Pahayag sini, importante man sa mga biktima pati ang kamatuoran nga na-serbe ang warrant.
Gin-ugyunan sini ang statement sang iban nga indi gid man tuman ka bakod ang international law, apang pahanumdom sini, indi man tuman ka luya ang layi kaangay sang pagdumdom sang kadam-an.
Mangibabaw ang rule of law suno sa iya kun nagatingob ang tanan.
“Many say that international law is not as strong as we want, and I agree with that. But as I also repeatedly emphasise, international law is not as weak as some may think,” suno kay Khan. “When we come together… the rule of law can prevail.”
Gindugang sini nga ang pagdakop kay Duterte ang isa ka importante nga tikang nga masigurado ang pagpanabat para sa mga biktima sang pinakaseryoso nga mga krimen sa idalom sang ICC jurisdiction.
Gina-umpisahan na subong sang korte ang preparasyon para sa una nga appearance ni Duterte sa The Hague kag sa magasunod nga judicial proceedings.
“This is a crucial step in our continuous work to ensure accountability for the victims of the most serious crimes under ICC jurisdiction. The Office is now commencing preparations towards the initial appearance and subsequent judicial proceedings before the Court,” pahayag sini.
Ginpasalamatan man ni Khan ang tanan nga mga biktima, survivors, mga testigo, kag mga aktibista sa Pilipinas nga nagkooperar sa ICC Office of the Prosecutor.
Ginahaylo man sini ang iban pa gid nga handa maghatag sang impormasyon nga magpakig-angot man sa ila paagi sa Witness Appeal portal sang ICC.
“Their strength, courage, and perseverance make these significant developments possible. Those who wish to further cooperate or who have relevant information are encouraged to do so via the Office’s Witness Appeal portal,” dugang sang chief prosecutor.
Sais minutos antes ang alas 12 sa tungang-gab-i (oras sa Pilipinas) sang naghugpa ang eroplano nga ginasakyan sang anay punong ehekutibo sa Rotterdam nga amo ang pinakamalapit nga airport sa The Hague kun sa diin nahatamtang ang international tribunal.
Pasado naman alas tres sa kaagahon (PST) sang nag-abot ang convoy sakay si Duterte sa Scheveningen detention facility.
