Nagalaum si Iloilo Governor Arthur Defensor, Jr. nga indi maapektohan ang trabaho sang gobyerno kasunod sang nagakalatabo nga political tension sa Pilipinas.
Ini kasunod man sang pagkaaresto kay former President Rodrigo Duterte bangud sa kaso nga crime against humanity.
Sa interview sang Bombo Radyo kay Governor Defensor, iya ginpahayag nga mas nakatutok subong ang gobyerno probinsyal sa mga nagapanguna nga problema sang probinsya.
Suno sa natungdan, magapabilin ang pagpakibato sang probinsya sa mga problema apisar sang matunog nga diskusyon sang kaso ni Duterte.
Nagapati man si Defensor Jr. sa fairness sang International Criminal Court (ICC) amo man sa mga korte sang Pilipinas.
Dugang sini nga mangin masulhay nga hustisya paagi sa insakto nga proseso.
Una na nga nagpahayag ang gobernador nga apisar sang tension sa pungsod, padayon sa gihapon ang pagtrabaho ilabi na sa Iloilo nga may ginapangatubang nga food security, dengue, kag ang mataas nga heat index.
