Nagapati si Iloilo Governor Arthur Defensor, Jr. nga wala sang rason agud indi mangin secured ang Pilipinas bilang Tourist Destination.
Ini kasunod man sang pagpaguwa sang Australia sang travel advisory may kaangtanan sa security concerns sang pungsod.
Sa interview sang Bombo Radyo kay Governor Defensor, iya ginpahayag nga wala siya sang may nakit-an nga problema sa seguridad para sa mga dumuluong sang pungsod kag bisan sa Western Visayas.
Gin-agda man sini ang mga Australian Nationals nga magpadulong sa Iloilo agud nga makit-an ang katahum sang syudad kag probinsya.
Suno kay Defensor, wala sang dalagko-an nga mga hublag-protesta sang anti kag pro-Duterte ang ginahiwat sa Iloilo.
Gin-athag man sini nga hilway ang mga may tuyo nga magprotesta nga isa man sa ila kinamatarong agud magpakita sang ila suporta.
Nagpanugyan man ang gobernador nga mangin responsable sa pag-exercise sang kinamatarong agud nga wala man sang may matapakan nga kinamatarong sang iban.
Una na nga ginpahanumduman sang gobyerno sang Australia ang mga pumuluyo sini nga likawan ang magpadulong ukon makigbahin sa mga protesta kag mga dalagkuan nga pagtililipon bangud posible nga mangin bayolente ang mga ini.
Kalakip sa mga lugar nga partikular nga gintumod ang central kag western Mindanao, kaupod na ang Zamboanga Peninsula, Sulu, kag Southern Sulu Sea kun sa diin mataas ang risgo sang terorismo kag pagpangidnap.
