Ginalantaw sang Land Transportation Office Region 6 (LTO-6) nga makabulig sa road safety ang pagkoordinar sang mga pulitiko sa ila talatapan subong nga election period.
Sa interview sang Bombo Radyo kay Atty. Gaudioso Geduspan, Regional Director sang Land Transportation Office Region 6, iya ginpahayag nga sa tagsa ka tuig, nagalab-ot sa 12,000 ang mga nagalakamatay bangud sa road accident sa pungsod kon sa diin, 70% diri ang motorsiklo.
Suno kay Geduspan, sa Western Visayas, indi magnubo sa 500 ang mga ginabawian sang kabuhi bangud sa vehicular accident.
Gin-athag man sini nga bilang director, responsibilidad niya nga panubuon ang datos kon sa diin, nagpasalig man ini nga tinghuwaan niya nga mapanubo.
Pasangkaron man sang talatapan ang law enforcement kag ang driver’s education sa mga motorista.
Bukas man ang LTO sa mga lecture events agud ma-edukar ang publiko sa road safety measures.
Ginklaro man ni Geduspan nga wala sang duag sang pamulitika ang mga tikang nga nasambit sini bangud wala man sila sang ginapili, eleksyon man ukon indi.
