Patay ang driver kag angkas sini nga iya hinablos matapos madagdag ang ginasakyan nga motorsiklo sa ginabulubanta tatlo ka tapak nga kataason nga kanal sa national road sang Sitio Malanay, Brgy. Sebaste, Sibunag, Guimaras.
Ang driver amo si Arnolfo Ganancial, 43-anyos, residente sang Brgy. Sebario, San Lorenzo, Guimaras samtang ang angkas sini amo ang 17-anyos nga solterito, residente sang Sitio Lanag, Brgy Ayangan, Sibunag, Guimaras.
Sa interview sang Bombo Radyo kay Police Lieutenant Leonard Jardiolin, Deputy sang Sebaste Municipal Police Station (MPS), iya ginpahayag nga papauli na kuntani ang duha halin sa isa ka resort matapos mag-selebrar sang wedding anniversary ang driver, sang nadulaan ini sang kontrol kag nakabunggo sa gutter nga rason sang pagkahulog.
Gilayon ang mga ini nga gindala sa Dr. Catalino Nava Provincial Hospital apang gindeklara nga dead on arrival.
Patal nga pilas sa ulo ang ila naagum nga nangin rason man sang ila kamatayon.
Base sa imbestigasyon, nakainom ang mga biktima kag posible madasig ang pagpadalagan sang motorsiklo.
