Naghatag sang update si former executive secretary Salvador Medialdea kaangot sa kondisyon ni former President Rodrigo Duterte nga subong lima ka adlaw na nga yara sa detention facility sa The Hague, Netherlands.
Suno kay Medialdea, maayo gid ang kahimtangan sang former chief executive apang nahidlaw lang ini sa kinaandan niya nga pagkaon kaangay sang uga, munggo, kag pinirito nga saging.
“Okay naman siya, he’s in very high spirits … Ano lang siya, naiisip niya ang mga sumusuporta sa kanya, nagpapasalamat siya sa inyong lahat… Isa sa medyo namimiss niya yung kanyang usual na kinakain, yung tuyo, yung munggo, at higit sa lahat yung piniritong saging. Yun ang nawawala sa kanya. Other than that, he’s okay, ipagdasal, keep on praying for him,” pahayag sini.
Ginsiling ni Medialdea nga halos isa ka oras lamang ang ila pagkit-anay kag madamo sang protocols nga kinahanglan sundon antes ini makasulod sa pasilidad.
Si Duterte, 79, ang nagapangatubang sang crimes against humanity charges kasunod sang iya ginpatuman nga drug war.
Sang Byernes sang gab-i oras sa Pilipinas, nag-attend siya sa proceedings sang International Criminal Court (ICC) paagi sa video link.
Sa amo nga hearing nga naglawig sang halos tunga sa oras, ginpakumpirma lang sa iya ang iya identity, ginbasa ang charges, ginpahibalo siya sang iya mga kinamatarong sa idalom sang Rome Statute, kag gin-schedule ang confirmation of charges sa Septyembre 23, 2025.
Sa una niya nga pag-atubang sa chamber, si Medialdea ang nagtindog nga legal counsel.#
