Naaktuhan sang isa ka sipulturero ang duha ka mga estuyante nga nagahimo sang kamala-malahan sa isa ka patyo sa La Paz, Iloilo City.
Sa interview sang Bombo Radyo kay Giger Poblacion, sipulturero, iya ginpahayag nga Byernes sang udto, Marso 14, 2025, may nagsulod nga babaye sa patyo kon sa diin, wala siya naglaum nga may lalaki na gali nga nagahulat sa iya.
Suno kay Poblacion, sa amo nga tion, nagahimo sila sang iya anak sang pantyon sang nasaksihan sini ang indi manami nga hitabo.
Ginlaragway man sini nga abi niya sa una, nagaistoryahanay lang ang duha, apang ulihi, natukiban sini nga nagadumugay na sila.
Sa amo nga tion, napuwag ang mga estudyante kag nagpalagyo.
Ginhawidan naman sang natungdan ang lalaki kag ginprangka pamangkot kon naga-ano sila sa lugar.
Gilayon man nga ginpanginwala sang lalaki nga wala sila may ginhimo apisar sang nasaksihan mismo sa akto sang sipulturero.
Gintuad man sini nga tunga sa oras nga nagpabilin sa sulod sang patyo ang duha antes nga nagguwa.
