ILOILO – Ginsulod sang kawatan ang isa ka classroom sa Dumangas National High School sa Barangay Población, Dumangas, Iloilo.
Sa interview sang Bombo Radyo kay Police Senior Master Sergeant Ronald Domines, imbestigador sang Dumangas Municipal Police Station, iya ginpahayag nga isa ka maestro ang nakadiskubre nga bukas na ang iya classroom.
Suno kay Domines, sang gin-check ini sang maestro, wala na ang mga gamit sini kaangay sang laptop.
Ginpahayag sang imbestigador nga ginalantaw nga posibilidad amo nga nalipatan nga siraduhan ang classroom ukon may access sa liyabe ang kawatan.
Ginsiling naman sang maestro nga masami nga ginabilin nila sa security guard ang liyabe kun sa diin apat sila ang nagabulos-bulos nga naga-duty sa eskwelahan apang nagapauli sila kung magtapos na ang ila shift.
Natukiban man nga ang iban nga mga classroom kag stockrooms ang gintuyo man nga buksan ang kandado, amo man ang ila nga canteen bangud may nakit-an nga buho sa pwertahan sini. via Bombo Mae Joy Amora
-With a report from Bombo Hanna Andasa
