Nagpanguna ang tiglawas sang Pilipinas nga si Alexie Mae Brooks sa pre-arrival race nga parte sang 2025 Miss Eco International pageant.
Base sa anunsyo sang international pageant, nangibabaw ang Ilongga beauty queen sa Eco Tourism Video challenge na gin-conduct via YouTube.
“The votes are in! Here are the top three contestants leading in the Eco Tourism Video challenge on YouTube! [graph emoji][camera emoji],” post sang organizers online.
Nagpangaduha naman ang delegate sang United Kingdom nga may yara man sang Filipino heritage, samtang pangatlo ang candidate sang Indonesia.
Patigayunon ang koronasyon sang 2025 Miss Eco International pageant sa Alexandria, Egypt sa Abril 8 kun sa diin iga-turn over ni Angelina Usanova sang Ukraine ang iya titulo sa iya mangin successor.
Si Brooks nga kilala man nga parte sang Philippine National Team sa Southeast Asian Games ang igapadala nga mag-compete sa global tilt matapos ini nakasulod sa Top 10 sang 2024 Miss Universe Philippines pageant.
Sa nagligad nga interview sang Bombo Radyo kay Brooks, ginpahayag sini nga paspas na ang ila preparasyon para ma-deliver ang best performance sa stage lakip na ang question-and-answer, runway performance, kag advocacy work nga naka-sentro sa women empowerment.
Ini ang iya una nga international pageant, gani may pressure suno sa iya, apang ginakabig man niya ini nga pribilehiyo.
Pananglitan magdaog ini, siya ang ikatlo halin sa Pilipinas nga may korona sa Miss Eco International pageant.
