Nagbayluhanay ang Russia kag Ukraine sang tag-175 ka mga preso nga amo ang pinakadaku nga numero nga ila napaguwa halin sang natabo ang Russian full-scale invasion sa Kyiv tatlo ka tuig na ang nagligad.
Natabo ang prisoner swap kasunod sang pag-istoryahanay nanday U.S. President Donald Trump kag Russian President Vladimir Putin.
Pareho man nga ginkumpirma sang Kyiv kag Moscow nga ginbalik man sang Russia sa Ukraine ang 22 ka dugang nga Ukrainian prisoners nga lunsay pilason.
Suno sa Russian Defence Ministry, ini nga 22 ang nagakinahanglan sang insigida nga pagbulong kag ginbalik sila bilang palatandaan sang goodwill gesture.
Ginkumpirma ini ni Ukrainian President Volodymyr Zelenskiy kag nagdugang pa nga ang nasamaran nga mga soldado ang ginpreso anay sang Russia bangud sa fabricated crimes.”
Ginsiling man nga nagpatunga ang United Arab Emirates agud nga ma-facilitate ang pagpauli sang mga preso sa ila tagsa ka pungsod.
Ang Russian soldiers naman nga nalakip sa amo nga swap ang yara sa Belarus para sa medical and psychological care antes dal-on sa Moscow para sa dugang nga treatment.
