Ginserbehan sang Iloilo Provincial Government sang Notice of Violation ang International Builders Corporation (IBC) bangud sa ginaalegar paghakot sang bato kag balas sa suba sa Cabatuan, Iloilo.
Sa interview sang Bombo Radyo kay Atty. Ceasar Emmanuel Buyco, head sang Iloilo Provincial Government Environment and Natural Resources Office (PGENRO), iya ginpahayag nga may mga reports kag dokumento nga naglab-ot sa ila nga may equipment ang IBC nga nagapanghakot sang bato kag balas nga sakop sang Barangay Bacan.
Ginaalegar suno kay Atty. Buyco nga ang iban nga ginahakot nga balas kag bato ang ginagamit sa construction sang dike malapit sa area apang may pila ka beses nga ginahakot paguwa ang quarry materials nga posible ginagamit man sa iban nga proyekto.
Pahayag sang natungdan, kinahanglan makapaathag ang International Builders Corporation sa akto nga ila ginhimo kun bala lehitimo ukon indi ang ila quarry operations.
Sa tion nga mabaton sang Iloilo Provincial Government ang paathag sang IBC, mapatigayon man sang validation ang PGENRO kag kun mapamatud-an nga wala sang permit ang operasyon, may yara ini sang nagakaigo nga penalidad ukon madagdagan sang cease-and-desist order.
Gin-athag naman sang Department of Public Works and Highways nga wala nila gin-authorize ang IBC nga maghakot sang bato kag balas nga gamiton sa dike.
Ginkumpirma ni DPWH Region 6 Director Engr. Sanny Boy Oropel nga proyekto sang ahensya ang dike sa Barangay Bacan.
Suno kay Oropel, responsibilidad sang contractor ang pagkuha sang permit para makakuha sang balas kag bato sa suba.
