Ginatudlo ni Senator Imee Marcos nga ang Interpol diffusion request ang wala sang “prior consultations” sa gobyerno sang Pilipinas kag nagapahanugot ini nga sundon ang mandu nga dakpon si anay Presidente Rodrigo Duterte.
Gintumod ni Sen. Marcos nga ang dokumento partikular nga nagapanawagan para sa mga panikasog sa pagpangita kag pagdakop nga may tuyo nga extradition, kag nagalakip sang mga probisyon para sa provisional arrest suno sa national laws kag/ukon applicable sa bilateral and multilateral treaties.
Suno naman kay Justice Secretary Boying Remulla, ginpili sang gobyerno sang Pilipinas nga isungka si Duterte sa Interpol.
Dugang ni Marcos, dapat ang publiko ang mangin hukom kon bala ginhatagan sang due process si anay presidente Rodrigo Duterte sang gindakop ini halin sa isa ka biyahe sa Hong Kong kag ginpalupad pakadto sa The Hague, Netherlands bangud sa iya ginaalegar crime against humanity.
Nahibaluan nga si Senator Marcos, chair sang Senate Committee on Foreign Relations, ang nagpanguna sa hearing sang Senado sa pagdakop sa anay presidente sang Marso 11.
Sa hearing sang Senate foreign relations committee sa pag-aresto kay Duterte, ginpresentar ni Marcos ang serye sang mga video clip halin sang ginserbe ang warrant of arrest sa anay presidente sang ini ang nagpauli sa Pilipinas halin sa Hong Kong, tubtob sang ginpalupad ini sa Netherlands.
Kon mapamatud-an nga may mga sala sa pagdakop kay Duterte, ginpahayag ni Marcos nga magabutang sila sang mga safeguards agud indi na ini matabo liwat.
Nagpabutyag naman si Palace Press Officer Usec. Claire Castro nga indi sini luyag nga mangin probinsya sang The Hague ukon China ukon bisan ano nga pungsod ang Pilipinas kasunod sang ginapatuman layi batok kay former President Rodrigo Duterte.
Suno kay Castro, nakahibalo si Presidente Ferdinand Marcos Jr. sa imbestigasyon sang Senado nga ginapangunahan sang iya utod nga si Sen. Imee Marcos.
Si Castro nagsiling nga ang Palasyo indi magpamatok sa imbestigasyon agud ipakita nga ang gobyerno nagasunod sa mga kasuguan sang Pilipinas kag wala sang ginatago sa pagdakop kay Duterte.
Suno kay Castro, naka-istorya na si Marcos kay Solicitor General Menardo Guevarra matapos ang pagbalibad ni Guevarra sa pagdepensa sa gobyerno sa habeas corpus petitions nga ginpasaka sang mga kabataan ni Duterte.
Ginpahayag ni Castro nga wala nadula ang pagsalig ni Marcos kay Guevarra.
