Gintuad sang opisyal sang Pulo Maestra Vita, Oton, Iloilo nga wala sa listahan sang ila barangay ang pangalan ni alyas Christopher nga amo ang driver sang salakyan kon sa diin nakumpiskar ang P816 million nga ginapahayag shabu sa Calapan Port, Oriental Mindoro.
Si alyas Christopher ang 43-anyos, isa ka truck driver kag residente sang nasambit nga lugar.
Sa interview sang Bombo Radyo kay Kagawad Anthony John Alunan, iya ginpahayag nga si Christopher ang may asawa kag lima ka mga kabataan.
Suno kay Alunan, wala na nagapauli sa Oton ang driver sugod sang 2019 apang nagapuyo subong sa banwa sang Pavia.
Gintuad man sang natungdan nga iloy na lamang sini ang nabilin sa ila puluy-an sa Oton kag duha ka mga utod sini.
Ginbuyagyag man ni Alunan nga ginpahalin sa Oton si Christoper bangud ginsunog sini ang ila balay bangud man sa pag-away nila sang iya asawa.
Suno na man sa Iloilo City Drug Enforcement Unit (ICDEU), indi pa mahambal kon yara gidman ang driver sa ila listahan kag padayon ang validation nga ila ginahimo sa amo nga operasyon.
Nahibaluan nga nakumpiskar sa natungdan nga driver ang iligal nga druga kasunod sang isa ka check point.
Sa salakyan nga dala sini, karga ang ginapatihan shabu nga nasulod sa maleta kag bag.
