Ginlutos sang 19-anyos nga Pinay tennis star nga si Alex Eala ang 2017 French Open champion nga si Jelena Ostapenko sa Round of 64 sang Miami Open sa Florida, USA.
Maga-abante na ang world no. 140 nga bugal sang Pilipinas sa Round of 32.
Naghilibion si Eala sang nahimo sini ang panibag-o nga upset, 7-6, 7-5, nga amo ang ginalantaw pinakadaku nga kadalag-an sa iya karera sa tennis.
Indi halos ini makapati bangud pang-numero 25 si Ostapenko sa world rankings kag kilala man nga nabulsa ang 2024 US Open women’s doubles title kaupod ang isa ka player halin sa Ukraine.
Antes nag-atubang sa 27-anyos nga Latvian player, ginlutos man ni Eala sa imbukada nga hampang ang world no. 73 nga si Katie Volynets sang United States, 6-3, 7-6 (7-3).
Buwas na ang masunod nga round sa hampang ni Eala apang ginabantayan pa kun sin-o ang makasambuwa sini.
