Kaangay nga nabunutan sang tunok ang pamilya sang ginpatay nga barangay tanod sa Barangay Amparo, Pavia, Iloilo matapos nga nadakpan ang suspek sa krimen.
Ang biktima amo si Carmelino Minor, Jr., alyas Bobot, 52, residente sang nasambit nga barangay.
Samtang ang gin-aresto naman sang kapulisan amo si Regie Gaborno, 41, residente man sang amo nga lugar.
Sa interview sang Bombo Radyo kay alyas Lotlot, ikaduha nga anak sang biktima, iya ginpahayag nga bisan paano, nabuhinan ang kabug-at nga ila nabatyagan bangud sa pagkadakop sa suspek.
Apang suno kay Lotlot, palaligban sa gihapon sa iya kun ngaa nahimo sang suspek ang pagpatay sa biktima bangud nga maayo man ang ila pagtamdanay halin sang una.
Matandaan nga nagahamyangon sa kahilamunan ang biktima sang nasapwan kag may igo sang bala sa nawala nga dughan.
