Pilason ang angkas sang isa ka motorsiklo matapos nga nagsuhot sa isa ka truck sa Benigno Aquino Avenue, Mandurriao, Iloilo City.
Ang driver sang motor amo si Vincent Rebano, residente sang Katilingban, Molo; samtang ang angkas sini amo si Reynaldo Sitchon, residente sang Brgy. Sooc, Arevalo, lunsay mga job hire sang Iloilo City Hall.
Sa interview sang Bombo Radyo kay Joy Maravilla, upod sang duha ka mga naaksidente, iya ginpahayag nga pabalik na kontani ang duha sa ila opisina sang hinali nga nabunggo-an sila sang nagasunod nga truck.
Suno kay Maravilla, napilpilan sang motorsiklo si Sitchon matapos nga natumba ini, samtang gilayon na man nga nakaguwa si Rebano.
Gilayon na man nga gindala sa Western Visayas Medical Center si Sitchon kag padayon nga ginapalapatan sang nagakaigo nga pagbulong.
