Balik sa presuhan ang isa ka lalaki matapos nakuhaan sang suspected shabu nga nagabalor sang P470,000 sa drug buy bust sa Barangay Sta. Cruz, Arevalo, Iloilo City.
Ini amo si alias Dave, 33, tumandok sang Barangay Calumpang, Molo, wala sang trabaho, kag may record na nga anay na-preso sang 2021 matapos nadakpan sang Regional Drug Enforcement Unit, apang nakaguwa sang 2024.
Nakuha sa iya possession ang 65 grams sang ginapasuni nga iligal nga droga nga ginabug-usan sang isa ka knot-tied transparent plastic bag kag apat ka magagmay nga pakete.
Sa interview sang Bombo Radyo kay Police Captain Ryan Christ Inot, head sang City DEU, iya ginpahayag nga sinemana man ang ila monitoring kay alias Dave matapos nabaton ang impormasyon nga sulod-guwa ang mga parokyano sini sa kun diin siya nagatinir sa Barangay Sta. Cruz.
Ginpahayag sang pulis nga tambay lang ang arestado, kag may kakilala ini sa sulod sang presuhan gani nga nagbalik sa iya opisyo sa pagbaligya sang droga.
Suno pa kay Inot, makalab-ot man kun kaisa ang area of operation sini pati sa Barangay Calaparan.
Ginsugid sini sa pulis nga may nagadul-ong lang sa iya sang parcel nga may unod nga illegal drugs, apang base sa iya statement, indi niya ini kilala.
Yara na ini subong sa kustodiya sang pulis kag natalana nga mag-atubang sang reklamo nga paglapas sa Republic Act 9165 ukon ang Comprehensive Dangerous Drugs Act of 2002.
