Indi pa mahulag sang Department of the Interior and Local Government (DILG)-Antique ang transition sang mga mabulos temporaryo sa walo ka mga Board Members nga ginsuspend sang Office of the Ombudsman bangud wala pa mahibalo-an kun san-o ang effectivity sang suspension order.
Sa interview sang Bombo Radyo kay DILG Antique Provincial Director John Ace Azarcon, iya ginpahayag nga gin-inform lang sila pinaagi sa Human Resource Managememt sang Provincial Government natuhoy sa suspension order nanday Board Members Egidio Elio, Rony Molina, Victor Condez,Alfie Jay Niquia, Plaridel Sanchez IV, Mayella Mae Ladislao, Keneth Dave Gasalao kag Julius Cezar Tajanlangit.
Nag-ugat ang suspension order sang walo bangud sa grave abuse of authority, grave misconduct kag conduct unbecoming of a public officer.
Suno kay Azarcon, nagpakig-angot man ang DILG Antique sa Central Office kun ano ang mangin epekto sang Omnibus Election Code bangud gina-challenge sang walo ka mga Board Members ang nangin desisyon sang Office of the Ombudsman .
Ang gin-cite sang mga board members amo ang Omnibus Election Code, Section 261, paragraph X nga nagasiling, ang suspension sang elective local officials ang ginadumilian sa tion sang election period.
Bangud sini, ginpakamaayo sang DILG Province of Antique nag mag-usisa sa legal services sang Central Office agud sila mismo ang makapakig-angot sa Commission on Elections (COMELEC).
Apang sa tion nga maathag na kun san-o ang effectivity sang suspension, may yara sang Administrative Order No.15 ang DILG nga may katuyuan nga maghatag sang pamaagi agud indi mabakante ang position sa Sangguniang Panlalawigan.
May kaangtanan sa walo ka mga board members, lima sa ila ang yara sa idalom sang isa lamang ka partido gani ang ila nga polical party amo ang maga-nominate sang temporaryo nga magabulos sa ila sa pwesto.
Samtang ang tatlo ka mga Ex-Officio members ang pagabuslan base sa nagasunod sa ila nga rangko.
May kaangtanan naman sa pagtambong sa session, indi luyag sang DILG nga pangunahan ini sa baylo mahulat na lang sang interpretation sang layi ang opisina halin sa COMELEC kag sa Office of the Ombudsman.
