Nagpagwa ang Bangko Sentral ng Pilipinas (BSP) sang memorandum para sa mga BSP-supervised financial institutions (BSFIs) agud pabaskugon ang ila surveillance kag monitoring systems kontra sa pagbakal kag pagbaligya sang boto, ilabi na sa nagahilapit nga eleksyon.
Ang BSP Memorandum No. M-2025-006, nga ginpirmahan sang Marso 23, 2025, ang nagamando nga maghimo sang tikang sa mga institusyon para kontrahon ang indi insakto nga pag-gamit sang mga digital channels, kaangay sang online banking kag mobile wallet applications, para sa pagbakal kag baligya sang boto.
Ginpasalig sang BSP nga bantayan ang anomaliya, kaangay sang gulpi nga pagtaas sang registration nga account sa mga lugar nga kilala sa pagbakal kag baligya sang boto nga may mga dalagko nga cash transactions sa tion sang eleksyon.
Ang memorandum sang BSP, nga kapareho sang mga nauna nga memorandum sang mga nagliligad nga eleksyon ang sabat sa panawagan sang Commission on Elections (COMELEC) pamaagi sa Resolution No. 11104, nga ginpagwa sang Enero 28, 2025, para sa mas hugot nga tikang batok sa pagbakal kag pagbaligya sang boto.
Kaupod sang BSP ang COMELEC kag Philippine National Police (PNP) sa pagtutok sa election-related cases ilabi na sa pagbakal kag pagbaligya sang mga boto gamit ang mga financial platforms.
