Nagaguwa sa medico-legal nga ‘physically fit’ ang duha ka mga kabataan nga una ginaalegar gin-hostage sang ila 31-anyos nga amay sa Barangay Compo, San Enrique, Iloilo.
Sa interview sang Bombo Radyo kay Regina Dativo, Head sang San Enrique Municipal Social Welfare and Development Office, iya ginpahayag nga ang resulta sang medical sang duha ka bata ang ‘physically fit’ nga buot silingon nga wala sang sensyales nga may trauma nga naangkon ang mga kabataan.
Suno kay Dativo, makit-an man sa kahimtangan sang mga bata nga yara sa mayo nga kahimtangan ang ila mental kag emotional state.
Gin-athag man sini nga padayon nga nagapaidalom sa counseling ang amay lakip na ang mga kabataan agud mahatagan sang nagakaigo nga intervention.
Ginpunto man sang natungdan nga ang doktor mismo nagsiling nga wala na-trauma ukon wala sang mga senyales nga gin-hostage ang kabataan.
