Nakatalana nga mag-atubangay sa barangay ang delivery rider kag customer nga nakabais sini sa nag-viral nga video nga nakuha sa Municipal Hall sang Mina, Iloilo kahapon nga adlaw.
Ang delivery rider amo si Alyas Mar, residente sang Barangay Mina West, Mina, Iloilo samtang ang customer naman amo si Alyas Serio, empleyado sa munisipyo sang Mina kag residente sang Barangay Amiroy sa amo nga banwa.
Sa interview sang Bombo Radyo kay Police Captain Isagani Tabares, hepe sang Mina Municipal Police Station, iya ginpahayag nga nag-report sa ila talatapan ang delivery rider nga luyag niya magreklamo batok sa customer nga nakabais sini bangud lain ang item sa sulod sang parcel nga nabaton niya.
Suno kay Tabares, nag-order sang duha ka pantalon nga brand new ang customer nga nagabalor P899 apang sang pagbukad niya sang iya parcel sa atubang sang delivery rider, ukay-ukay ukon relief nga pantalon ang sulod sini.
Ginkadismaya ini sang customer kag naghambal nga indi siya magbayad kag ginpaathagan ini sang delivery rider nga kun mabuksan ang parcel, bayaran gid ini apang antes nga maklarohan nagbaisay na ang duha nga naglab ot sa pagbuya sang mga masakit na nga tinaga sang customer sa delivery rider.
Sa subong, nagapakig-angot na ang kapulisan sa barangay officials sang Barangay Amiroy agud mahusayan na ang duha.
