Ginkadismaya sang pila ka mga motorista ang pagpug-ok sang trapiko sa Iloilo City Proper bangud sa road closure nga ginpatuman sang Traffic and Transportation Management Office (TTMO).
Ini kasunod man sang patigayunon nga kick-off rally sang Team USWAG ni Iloilo City Mayor Jerry Treñas.
Sa interview sang Bombo Radyo kay Joselito Dadivas, tri-sikad driver, iya ginpahayag nga kontani, ginbutang na lang sa Sabado ukon Dominggo ang ila aktibidad agud indi na makatuga sang huol sa publiko.
Suno kay Dadivas, bilang nagabyahe kon weekdays, tuman ka apektado ang ila palangabuhian kon sa diin, mahina ang pasahero kag indi gilayon makabalik sa ila ruta.
Ginpahayag man sini nga dugangan pa sang mainit nga panahon, mabudlay sa ila bahin ang amo nga sitwasyon.
Gintuad man ni Dadivas nga bisan ang iya pasahero ang nagareklamo sa madugay nga dalagan sang trapiko bangud sa closure.
Wala na man mapunggan ni Jenny Matias, isa ka pasahero nga magpabutyag sang iya sakit sang buot bangud sa kalawig nga byahe.
Suno kay Matias, naglawig sang duha ka oras ang iya ginsakay bangud sa tuman nga papugok sang trapiko halin sa distrito sang Jaro tubtob sa Iloilo City Proper.
Gintuad man sini nga ini ang labing-una nga tinion nga natabo sa iya ang amo nga sirkumstansya.
