Natalana nga magbukas ang ganhaan sang Grand Slam tournaments para sa Pinay tennis star nga si Alex Eala matapos sini ginpanglutos ang tatlo ka Grand Slam champions sa Miami, Florida, USA.
Subong nga semana natalana nga mangin opisyal nga makalab-ot si Eala sa No. 75 sa world rankings kun matapos na ang Miami Open kag ma-refresh na ang Women’s Tennis Association (WTA) ranking.
Sa live ranking nga unofficial kag real-time projection sang standing sang player base sa ila resulta, pang-75 na si Eala nga daku nga lukso halin sa pwesto sini nga pang-140 antes ang iya Cinderella run sa Miami.
Lakip sa masudlan niya kun yara siya sa Top 100 amo ang French Open sa summer. Eligible man ang Pinay sa direct invite sa Wimbledon kag US Open matapos ang iya first-round exit sa Australian Open qualifiers sang nagligad nga Enero.
Ini bangud may direkta na siya nga entry sa kada main draw sang masters kag major tournaments lakip na ang Roland Garros, Wimbledon, Australian Open kag US Open sa kondisyon nga magpabilin lang siya sa sulod sang elite circle.
Sang una, nakahampang lamang si Eala sa sini nga tournaments paagi sa wildcard invite kag tubtub lamang sa qualification rounds kag wala na nakaabante sa main draw.
Kun matabo ini, si Eala ang mangin una nga Pinay nga makahampang sa main draw sang anuman nga Grand Slam tournament.
