Ginahanda na ang 66,235 metric tons (MT) sang kalamay nga iga-export sang Pilipinas sa Estados Unidos sang Amerika umpisa sa Abril subong nga tuig.
Suno kay Sugar Regulatory Administration (SRA) Administrator Pablo Luis Azcona, ginahanda na sang exporters ang duha ka mga barko nga amo ang magadala sang kalamay.
Sang nagligad nga tuig, madumduman nga diutayan lang nga wala nakahingabot ang Pilipinas sa Septyembre 30 nga deadline. Natigayon nga nakaabot ang produkto sang Septyembre 27 apang may natabo na nga discoloration kag quality deterioration rason nga may gindagdag nga 10-percent penalty.
Subong nga tuig, himuon ang shipment kadungan sang milling season agud masigurado nga preska pa ang iga-export.
Pahayag ni Azcona, napahibalo na sang ahensya ang United States nga idul-ong ang raw sugar antes ang Agusto.
Sa sitwasyon naman sa pag-harvest kag paggaling sang tubo sa Negros Island Region, ginsiling ni Azcuna nga kadam-an sa sugar producers sa south ang manugtapos naman; samtang sa north naman, may mga delay lang nga nagakatabo bangud sa masami nga pag-ulan.
Tubtub sa Mayo ang pag-harvest.
Una naman nga nag-promisa ang Department of Agriculture (DA) kag ang SRA sa sugarcane farmers nga wala sang sugar importation order nga ipaguwa halin sa Mayo tubtub sa Hunyo.
