Nag-file sang kaso nga ‘unexplained wealth’ si former Iloilo City Councilor Plaridel Nava sa Office of the Ombudsman Regional Office VI batok kay Iloilo City Lone District Representative Julienne “Jamjam” Baronda.
Sa interview sang Bombo Radyo kay Nava, iya ginpahayag nga makatilingala ang gulpiyada nga pagdako sang manggad ni Baronda kag makabakal sang mga malahalon nga luxuries, condominium, salakyan, housing unit, kag iban pa.
Suno kay Nava, ang isa ka manggad nga indi ma-eskplekar ang isa ka ‘Ill-gotten wealth”.
Gintumod man sini nga antes na-eleher bilang kongresista si Baronda, isa lamang ini ka kontrakwal nga empleyado ni Senator JV Ejercito nga nagaswweldo sang P15,000 kada bulan.
Nakasaad man sa affidavit nga wala sang lehitimo nga negosyo ukon profession nga mahimo sini makuhaan sang dako nga income.
Ginpahayag man ni Nava nga indi manggaranon ang pamilya ni Baronda nga mahimo maka-justify sang amo nga mga pagkabutang.
Nagalaum man ini nga paagi sa Statement of Assets, Liabilities, and Net Worth ukon Income Tax Return (ITR) mahimo mapaathag sang mamalidha ang ginapahayag sobra-sobra nga manggad sini.
Ginpunto man sang anay city councilor ang nangin sitwasyon ni former Mayor Jed Patrick Mabilog nga na-dismissed sang Ombudsman bangud sa unexplained wealth nga mahimo man matabo kay Baronda.
Wala pa man nabaton sang kampo ni Iloilo City Lone District Representative Julienne “Jamjam” Baronda ang kopya sang kaso nga gin-file ni former Iloilo City Councilor Plaridel Nava sa Office of the Ombudsman Regional Office VI.
Suno kay interview sang Bombo Radyo kay Atty. John Mallare, spokesperson sang Team Sulong Gugma, iya ginpahayag nga indi pa makahatag sang detalye ang mamalidha ilabi na nga wala pa sila nakabaton sang written copy sang kaso.
Dugang ni Mallare, lunsay alegasyon lamang ang mga ginapangbato ni Nava kag wala sang mga ebidensya nga ginakaptan.
Gin-athag man sini nga wala nahadlok ang kampo ni Baronda nga atubangon ang mga panumbungon nga ginpasaka sang anay city councilor.
Ginalantaw man sang natungdan nga ma-dismiss ang kaso bangud isa lamang ini ka pamulitika nga pagpang-atake sa ila.
Nagpalabtik man ini sa kampo sang Team USWAG nga maghulat-hulat lang bangud mabato sila sa ano man nga mga ginahaboy sa ila nga alegasyon.
