Ginkumpirma sang hepe sang Antipolo City Police nga napatay subong nga gab-i ang isa sa apat ka mga tawo nga napilasan sang natabo ang road rage shooting incident sa Marcos Highway, Sito Calumpang, Brgy. San Jose, Antipolo.
Suno kay Police Lieutenant Colonel Ryan Manongdo, ang biktima nga ginbawian sang kabuhi amo ang may igo sang bala sa iya nga ulo. Base sa nag-viral nga video, siya ang natumba malapit gid sa SUV sang gintiro sang suspek sa malapit gid lamang nga distansya.
Mas magabug-at ang kaso nga atubangon sang suspek suno sa pulis: “I-a-upgrade [ang kaso]. Kukunin lang natin ang death certificate ng nasawing biktima.”
Antes ini nga development, three counts sang frustrated murder kag paglapas sa gun ban ang una nga ginpasaka sa suspek nga si Kenneth, 28, isa ka negosyante.
Base sa una nga press release sang Antipolo PNP, ang mga nasamaran sa insidente amo ang 52-anyos nga businessman nga may pilas sa ulo; 22-anyos nga college student nga natiruhan sa butkon; kag ang 29-anyos nga lalaki nga natiruhan sa tuo nga parte sang dughan sang nagtinguha ini nga magtambag sa away. Naigu man sang bala ang paa sang babaye nga kaupod mismo sang suspek.
Nalagyo pa ang suspek sakay sa itom nga Toyota Fortuner apang nadakpan sa hot pursuit operation kag yara na subong sa custodial facility sang pulis.
Ginkumpirma sang pulis nga wala sang dala ang suspek nga Certificate of Authority halin sa Commission on Elections nga maga-exempt sa iya sa pagdala sang armas bisan may ginapatuman nga nationwide election gun ban.#
