Nabutang sa alang-alang ang status sang Gilas Pilipinas import nga si Justin Brownlee kun makahampang bala ini kaupod ang national team sa 2025 FIBA Asia Cup.
Ini matapos nagguwa ang ikaduha nga posible nga doping violation nga mahimo mangin rason kun ngaa indi siya pag-ilakip sa tournament sa Saudi Arabia nga magasugod na sa Agusto 5-17.
Mismo si Samahang Basketbol ng Pilipinas (SBP) president Al Panlilio ang nagkumpirma nga nabaton na sang national federation ang notice sang adverse analytical finding (AAF) sa isa sa random tests kay Brownlee. Ini nga notification amo ang pagpositibo sa substance nga yara sa lista sang mga ginadumilian sang World Anti-Doping Agency.
May indi pa kumpirmado nga reports nga nagasiling nga ini nga test ang naangot sa paggamit sang recreational drug, apang wala pa sang statement halin sa kampo sang naturalized star.
Apang suno sa SBP, ginahikot na ni Brownlee ini nga isyu kaupod ang iya legal team nga nakabase sa Estados Unidos.
Kun ma-suspend si Brownlee, ini na ang ikaduha nga tion nga madagdagan ini sang suspensyon nga naangot sa iligal nga droga.
Matandaan nga pagkatapos nga ginpangunahan sini ang gold medal win sang Pilipinas sa Asian Games sa China sang 2023, ginkumpirma man nga nagpositibo siya sa Carboxy-THC nga isa ka compound nga naangot sa cannabis. Sunod siya nga gindagdagan sang tatlo ka bulan nga suspensyon sa anuman nga organized basketball.
Sang nakabalik, ginpangunahan liwat sini ang Gilas lakip sa maragtason nga Olympic Qualifying Tournament run sa Riga, Latvia, kag ang dominant run sa Asia Cup Qualifiers nga amo ang naghatag sang spot sa Pilipinas sa main tournament sa Agusto.
Pananglitan indi gid man makaupod ang Tifton, Georgia native sa Gilas, una na nagguwa ang pangalan ni Ange Kouame nga amo ang naturalized player nga magabulos sa iya.
