Ginpanginwala sang opisyal sang Barangay Veterans Village, Iloilo City Proper nga ginpatyan nila sang suga ang mini rally sang Team Sulong Gugma kahapon nga adlaw.
Sa interview sang Bombo Radyo kay Punong Barangay Celia Calaor Campo, iya ginpahayag nga wala man sila sang problema sa permit bangud nakapasa man ang nasambit nga grupo.
Suno kay Campo, ginpahanugutan gani nga maggamit sang covered gym ang grupo bisan nga late na ang ila permit.
Gin-athag man sini nga posible nga nag-low voltage lamang ang natabo ilabi na nga halog ang saksakan nga ila gingamit sa likod sang stage.
Ginpahayag man sang natungdan nga wala nakakonsulta sa ila ang kampo sang Team Sulong Gugma antes nagbutang sang ila mga kinahanglanon sa campaign rally.
Ginpunto man ni Campo nga kontani nagkonsulta ang Team Sulong Gugma agud makapahalinton man sila sang insakto nga saksakan sang ila mga electric devices.
(GUGMA RALLY 2)
Nagpanindugan man ini nga gin-akomodar nila ang amo nga grupo apisar pa nga lain sila nga Partido.
