Nagpanawagan ang Commission on Elections (COMELEC) Region VI sa mga kandidato nga magpamalandong sa tion sang Semana Santa kag likawan ang mangampanya.
Sa interview sang Bombo Radyo kay Atty. Dennis Ausan, Regional Director sang Commission on Elections VI, iya ginpahayag nga tanan nga sahi sang pagpangampanya ang ginadumulian sa Abril 17 tubtob 18, 2025 nga isa ka balaan nga adlaw sa pag-obserba man sang Semana Santa sang simbahang-katolika.
Suno kay Ausan, lakip sa pagsulundan amo ang pagdumili sang social media posting halin sa bahin sang mga kandidato apang, kon ang supporters mismo ang mag-post, react, kag share sang content sang local candidate, mahimo gid nila ini nga ubrahon.
Ginsaysay man sini nga antes ang adlaw sang eleksyon kag adlaw mismo sang eleksyon sa Mayo 11 kag 12, 2025, ginadumilian man ang magpangampanya, sa social media man ukon sa personal.
Nahibaluan nga ang sin-o man ang indi magsunod sa amo nga mga pagsulundan ang magapangatubang sang kaso sa paglapas sa Comelec Resolution No. 11086 ukon ang Republic Act No. 9006 ukon Fair Elections Act.
