Pormal na nga magapungko subong nga adlaw bilang bag-o nga arsobispo sang Archdiocese of Jaro si Most Rev. Midyphil Bermejo Billones, D.D. bulos kay Most Rev. Jose Romeo O. Lazo, D.D., Archbishop-emeritus of Jaro.
Patigayunon ang Solemn Pontifical Mass with Rite of Canonical Installation sang bag-o nga arsobispo sa las 9:00 subong nga aga sa Jaro Metropolitan Cathedral.
Matandaan nga si Billones ang gin-appoint ni Pope Francis kag gin-anunsyo ini sa Vatican kadungan sang kapiestahan ni Nuestra Señora Dela Candelaria ukon our Lady of Candles.
Si Billones nga naga-edad 55-anyos amo na ang mangin ika-14 nga archbishop sang Jaro nga nagasakop sa syudad kag probinsya sang Iloilo amo man sa probinsya sang Guimaras.
Nabun-ag siya sa Panay, Capiz.
Nagtuon siya sang Philosophy sa St. Vincent Ferrer Seminary sa Iloilo City kag Theology sa Loyola School of Theology sa Quezon City kun sa diin nakuha sini ang master’s degree sa amo man nga program.
Na-ordenahan siya bilang pari sa Archdiocese of Jaro sang Oktubre 2, 1995 ukon halos tatlo ka dekada na ang nagligad.
Lain-lain man nga posisyon ang gintungdan sini sa simbahan lakip na ang pagpungko bilang personal secretary kanday Archbishop Alberto Piamonte kag Archbishop Angel Lagdameo.
Sang 2011, naangkon sini ang Doctorate in Theology halin sa Pontifical Gregorian University sa Roma.
Sang Hulyo 2019, nagaserbe pa sadto si Billones bilang rector sang St. Joseph Regional Seminary of Jaro sang gin-appoint siya sang Santo Papa bilang auxiliary bishop sang Cebu.
Na-ordenahan siya sa episcopate sang Agusto 27, 2019 diri man sa Jaro Cathedral.
