Pormal na nga nagpungko si Most Rev. Midyphil Bermejo Billones, D.D. bilang arsobispo sang Archdiocese sang Jaro.
Ginpatigayon ang Solemn Pontifical Mass with Rite of Canonical Installation sang bag-o nga arsobispo subong nga adlaw sa Jaro Metropolitan Cathedral.
Nagtal-os si Billones kay Most Rev. Jose Romeo O. Lazo, D.D., Archbishop-emeritus sang Jaro.
Gintambungan sang ginabanta 40 ka mga bishops kag masobra 300 ka mga kaparian, upod ang mga prominente nga bisita nga sanday Papal Nuncio to the Philippines Archbishop Charles John Brown kag Manila Archbishop Jose Cardinal Advincula.
Kun madumduman, gin-appoint si Billones bilang ika-7 nga arsobispo ni Pope Francis sang Pebrero 2, ini kadungan sang kapiestahan sang Nuestra Señora de la Candelaria.
Sa interview sang Bombo Radyo kay Rev. Fr. Angelo Colada, head of the Social Communications Office, iya ginpahayag nga kabahin sang liturgical schedule amo ang Vesting sang bishops kag sang mga kaparian sa Archbishop’s Residence, kag procession sa Jaro Metropolitan Cathedral.
Si Billones ukon kilala sa tawag nga Dodong nga naga-edad 55-anyos ang ginbun-ag sa Panay, Capiz.
Nagtuon siya sang Philosophy sa St. Vincent Ferrer Seminary sa Iloilo City kag Theology sa Loyola School of Theology sa Quezon City kun sa diin nakuha sini ang master’s degree sa amo man nga programa.
Na-ordenahan siya bilang pari sa Archdiocese of Jaro sang Oktubre 2, 1995 ukon halos tatlo ka dekada na ang nagligad.
Lain-lain man nga posisyon ang gintungdan sini sa simbahan lakip na ang pagpungko bilang personal secretary kanday Archbishop Alberto Piamonte kag Archbishop Angel Lagdameo.
Sang 2011, naangkon sini ang Doctorate in Theology halin sa Pontifical Gregorian University sa Roma.
Sang Hulyo 2019, nagaserbe pa sadto si Billones bilang rector sang St. Joseph Regional Seminary of Jaro sang gin-appoint siya sang Santo Papa bilang auxiliary bishop sang Cebu.
Na-ordenahan siya sa episcopate sang Agusto 27, 2019 diri man sa Jaro Cathedral.
