Padayon pa nga ginapangita ang isa ka lalaki nga ginaalegar naglumpat sa Iloilo River kaina sang kaagahon matapos ginpulihan, ginlampusan, kag ginaalegar nga nabun-an sang mga lalaki sa City Proper bangud sa isyu nga nag-ugat sa transaksyon sa commercial sex workers.
Ini amo si alias Archie, 38, nga isa ka manugbaligya sang ice cream.
Sa interview sang Bombo Radyo kay Darwin, manghod ni Archie, iya ginpahayag nga naga-inum-inom sila sa Barangay Sinikway, Lapuz kag sang ulihi nagdesisyon sila nga apat nga mag-transact sa mga commercial sex worker sa City Proper.
Sa alegasyon ni Darwin, sang naga-istorya na sila sa commercial sex workers sa downtown area, gulpi lang may nagpalapit nga mga lalaki kag ginpulihan sila ukon ginsapote. Antes sina, ginaalegar nga nagbaisay pa sila sa presyo kag may natabo pa nga ayu-anay apang wala nag-intindihanay.
“Nabun-an akon magulang bangud sa mga p*k-p*k… Hindi namin alam na ang mga p*k-p*k ay may mga asawa pala, edi pinagtulungan kami, edi nagka-engkwentro kami,” suno kay Darwin.
Wala nakilala ni Darwin kun sin-o ang mga lalaki pero nagapati ini nga mga bana ini ukon nobyo sang mga commercial sex worker.
Sang ulihi, sang nabun-an si Archie sa ulo kag ginsakay ini sa tricycle, ginaalegar nga sang malapit na sa taytay, nagdalagan ini sa suba kag naglumpat agud maghilam-os apang tubtub subong wala pa nakita. Na-report na sa pulis ang amo nga insidente.#
