Ginapreparar na ang kaso nga murder batok sa mag-utod nga suspek sa pagtiro-patay sa stay-in driver ni Land Transportation Office (LTO) VI director Atty. Gaudioso P. Geduspan II sa Parc Regency Subdivision, Brgy. Ungka 2, Pavia, Iloilo kagab-i, Abril 3.
Ang biktima amo si Wilmer Casquite Villaros, legal ang edad, kasado, residente sang Janiuay, Iloilo, apang temporaryo nga nagatinir sa amo nga subdivision.
Samtang ang mga suspek, amo sanday Jay-R, 40, kag Boy, 45, kag nagaalegar nga taga-Barangay Aldeguer, Sara apang may I.D. nga nagapakita nga taga-Pampanga.
Sa interview sang Bombo Radyo kay Alyas Jun, amay sang mga suspek, iya ginpahayag nga kon yara lang siya antes natabo ang insidente, mahimo siguro nga napunggan pa ang pagpangluthang sang iya mga anak.
Suno kay Alyas Jun, may tion man nga madasig mag-init ang ulo sang iya anak, apang ginlaragway man sini nga mga mabuot.
Gintuad man sini nga wala na siya sang may mahimo sa iya anak kundi batunon na lang ang natabo bangud natapos na.
Ginpahayag man sang amay nga sabton na lang sa iya mga anak ang dapat salabton bangud indi insakto ang ila ginhimo.
Una na nga ginbuyagyag sang mga suspek nga ginapahog sila sang biktima paagi sa pagtulok-tulok kag pagbunot sang armas, gani gin-unahan na lang nila ini sa pagpatay
