Gin-athag sang Iloilo Police Provincial Office (IPPO) nga ‘administrative relieve’ lang ang gindagdag sa hepe sang Pavia Municipal Police Station nga si Police Major Harold Rendora.
Sa interview sang Bombo Radyo kay Police Colonel Bayani Razalan, Director sang Iloilo Police Provincial Office, iya ginpahayag nga nag-ugat ang relieve ni Rendora kasunod sang reklamo ni Land Transportation Office (LTO) VI director Atty. Gaudioso P. Geduspan II sa nangin response sang Pavia PNP sa pagtiro-patay sa iya stay-in nga driver.
Suno kay Razalan, indi gilayon nga totally ma-relieve si Rendora sa pwesto kag ini ang temporaryo lamang samtang nagapadayon ang imbestigasyon sa amo nga insidente.
Gintuad man sini nga ginsaysay ni Atty. Geduspan nga isa sa ginreklamo sini amo bangud wala gilayon naaktohan sang Pavia PNP ang nangin blotter sang iya nga driver antes natabo ang insidente.
Gin-athag man ni Razalan nga wala lang gid gilayon nahatagan sang nagakaigo nga tikang ang amo nga kaso, apang gilayon man nga nadakpan ang mag-utod nga suspek sa isa ka checkpoint sa Sara, Iloilo.
Sa subong, magaserbe bilang Officer in Charge (OIC) sang Pavia PNP si Police Major Dadje Delima nga chief man sang Iloilo Provincial Drug Enforcement Unit (PDEU).
Kon balikan, patay gid ang driver ni Atty. Geduspan nga si Wilmer Casquite Villaros, legal ang edad, kasado, kag residente sang Janiuay, matapos nga ginluthang sang mga suspek nga amo sanday Jay-R, 40, kag Boy, 45, kag nagaalegar nga taga-Barangay Aldeguer, Sara, Iloilo.
