Nag-agum sang lima ka patal nga mga pilas ang stay-in driver ni Land Transportation Office (LTO) VI director Atty. Gaudioso P. Geduspan II sa Parc Regency Subdivision, Brgy. Ungka 2, Pavia, Iloilo matapos nga ginluthang sang mag-utod.
Ang biktima amo si Wilmer Casquite Villaros, legal ang edad, kasado, residente sang Janiuay, Iloilo, apang temporaryo nga nagatinir sa amo nga subdivision.
Samtang ang mga suspek, amo sanday Jay-R, 40, kag Boy, 45, kag nagaalegar nga taga-Barangay Aldeguer, Sara apang may I.D. nga nagapakita nga taga-Pampanga.
Sa interview sang Bombo Radyo kay Police Lieutenant Gabirel Manguera, Deputy Chief of Police sang Pavia Municipal Police Station, iya ginpahayag nga nakaangkon sang pilas ang biktima sa iya nga ulo, likod, kag kamot.
Suno kay Manguera, na-recover sa crime scene ang empty shells sang 9mm nga pusil apang, duha ka mga armas ang gingamit sang mga suspek kon sa diin, caliber 22 ang isa.
Gintuad man sini nga ginahulat pa ang resulta sang autopsy result sang biktima agud nga mas maathag sa talatapan ang nangin kabangdanan sang kamatayon sini.
Gin-ako man sang natungdan nga tubtob subong, wala pa nila matul-id kon sa diin ginhaboy sang mga suspek ang ila armas.
Ginalantaw man sang Pavia PNP nga magdagdag sang search warrant sa mga suspek agud nga malantaw ang ila puluy-an kag mapangita ang mga armas nga gingamit sa krimen.
Ipasaka naman subong nga adlaw ang kaso nga murder batok sa mga suspek.
